На моја иницијатива ќе се пристапи кон бришење на маркиците за градба на згради, Арсовска само го повтори што го кажав јас, пишува на социјалните мрежи, градоначалникот на Бутел, Дарко Костовски.
„Јас како градоначалник не слушам апели од Данела Арсовска и Град Скопје, туку работам неколку чекори пред нив! Арсовска поради недостаток на идеи и иницијативи сака да си присвои нешто за кое воопшто не произлегло од неа. Имено на мое излагање пред медиумите на 9 март јасно и гласно потенцирав дека на моја иницијатива ќе се пристапи кон бришење на спорните маркици за згради. И тоа се случи на 15 март со седницата на Советот на Општина Бутел“, вели Косотовски.
Градоначалникот на Бутел рече дека на Арсовска и требале неколку дена, односно на 11 март да излезе јавно со низа лаги и неосновани обвинувања да го повтори тоа што веќе тој го кажал. Потоа, вели Косотовски, Арсовска ги известила медиумите дека маркиците биле отстранети по нејзина иницијатива.
Костовски порача дека Бутел ќе биде зелена општина со најмногу зелени површини и за тоа не треба да се грижи Арсовска затоа што граѓаните на Бутел имаат градоначалник кој ќе го зачува мирниот и спокоен живот во оваа општина.
