Парламентарното мнозинство предводено од СДСМ ги усвои измените на Законот за здравствено осигурување, изјави пратеникот Ненад Коциќ на прес-конференција.
Коциќ рече дека со овие измени се ослободуваат од плаќање партиципација лицата со попреченост и со над 26 години возраст.
Образложи дека станува збор за долгогодишно барање на оваа категорија граѓани.
„На овој начин, го олеснуваме пристапот до лекарски услуги на лицата со попреченост кои повеќе нема да треба да плаќаат партиципација за услугите што ги добиваат. Ова, освен во делот на лекување, позитивно ќе влијае и на превентивата и на редовните лекарски прегледи на лицата со попреченост“, рече Коциќ.
Додаде дека унапредувањето на квалитетот на живот на сите категории граѓани, останува врвен приоритет за СДСМ и за парламентарното мнозинство.
