Вицепремиерот Артан Груби не гледа ништо спорно што претседателот на ДУИ, Али Ахмети, во просториите на Министерството за политички систем си остварува партиски средби. Смета дека реакцијата на антикорупциската комисија е бидејќи тие не ги добиле просториите што требало да ги имаат, а каде што се всели министерството со кое раководи тој.
„Изгледа како мал непребол оти не ги добија тие простории. Ахмети е пратеник во Собранието, јас сум во секојдневен контакт со него, така што има реализирано средби и дел од парламентарното мнозинство, владината коалиција. Не гледам голема одговорност. Но, ако е толку голем проблем, ќе гледаме да не се повторува“, посочи Груби.
Антикорупциската најави дека ќе упати укажување до заменикот на претседателот на Владата задолжен за политики за добро владеење, Славица Грковска, за прекршување на етичкиот кодекс.
