Утрински Весник
Свет

Французите протестираа против десницата

20240704080233 Big 730x400 72.webp.webp

Илјадници луѓе се собраа синоќа во Париз на повик на бројни медиуми, синдикати и здруженија да повикаат на гласање против екстремната десница на вториот круг од парламентарните избори што се одржува в недела.

– Да се бара некои од нас да гласаат за политички противник на 7 јули е тежок чин, но неопходен ако сакаме да ја спасиме нашата способност за заеднички живот, истакнаа организаторите на протестите во Париз, повикувајќи се на сите изборни единици во кои некои кандидати се повлекоа со цел да го зајакнат противникот на Националниот собир (РН, крајна десница) и да ја спречат екстремната десница да победи на изборите.

– Кога екстремната десница е на власт, таа не ја враќа лесно власта, таа обезбедува дестабилизирање на владеењето на правото, луѓето на власт да ги уништуваат јавните слободи, рече на бината еден од првите говорници, историчарот Патрик Бушерон.

– Секако, одговорноста на левицата е огромна. Што направи левицата за да ги изгуби сите овие градови и села што требаше да ги освои, да инвестира во нив, да ги трансформира? Се разбира, утре ќе треба да биде поамбициозна, на данокот на богатството, на зголемување на платите, на оданочување на мултинационалните компании, оцени од своја страна економистката Џулија Кејџ.

– Мораме да го убедиме секој гласач дека не смееме да ѝ се предадеме на омразата и оти апстиненција не е опција, изјави за новинарите Доминик Сопо, претседател на SOS Racisme.

Во Авињон, каде што се одржува еден од најважните театарски фестивали во светот, неколку стотици луѓе исто така маршираа против РН.

– Заканите за нашите сектори се големи, нагласи Гислаин Готје, генерален секретар на синдикатот CGT Spectacle.

Екстремно десничарската партија Национален собир (РН) нема да освои мнозинство во францускиот парламент по вториот круг од парламентарните избори в недела, покажаа резултатите од анкетата на Харис интерактив.

Анкетата покажа дека партијата Национален собир и нејзините сојузници ќе добијат од 190 до 220 места. Тоа е многу помалку од потребните 289 места за мнозинство.

Повеќе од 200 кандидати од целиот политички спектар се согласија да се повлечат од трката за локалните избори за да му направат пат на кандидатот кој најверојатно ќе го победи кандидатот за РН во нивната изборна единица. 

Можете да прочитате

Фон Дер Лајен повторно избрана за претседателка на Европската комисија

Италијанска новинарка мора да и плати на Мелони 5.000 евра поради исмевање на нејзината висина

Властите во Парагвај открија повеќе од четири тони кокаин скриени во пратка шеќер