Објавени се нови фотографии од снимањето на And Just Like That… („И, едноставно, така…“), новата сезона на хит-серијата „Сексот и градот“.
Втората сезона е во подготовка, а фотографиите открија дека се враќа еден од омилените актери од оригиналната серија.
Имено, „Ејч-би-о макс“ со фотографии го најави враќањето на Џон Корбет, актерот што го отелотвори Ејдан, големата љубов на Кери. „Шш, никому не кажувај му“, пишува во описот на објавата.
На фотографиите, Кери и Ејдан одат по улица држејќи се за рака, што сугерира дека поранешната двојка ја обновила својата романса.
Поминаа повеќе од десет години откако фановите на серијата ги видоа Ејдан и Кери заедно. Во 2010 година Ејдан се појави во филмот „Сексот и градот 2“, кога тој и Кери случајно се сретнаа во Абу Даби и се бакнаа.
Тој првпат се појави во третата сезона на серијата, а нивната врска завршува кога Кери ќе му го скрши срцето. По разделбата со Кери, тој се оженува со колешката Кети и со неа има три деца, а втората сезона ќе ја открие состојбата на нивниот брак и каква иднина го чека со Кери.