Според првичните неофицијални резултати кои ги соопшти Државната изборна комисија (ДИК) по денешното прегласување на седум избирачки места во 5. и 6. изборна единица, коалицијата Вреди на здружената албанска опозиција освои уште еден мандат, а ДУИ загуби. Во шестата изборна единица се прегласуваше на едно избирачко место, во Желино, по кое коалицијата на ДУИ падна од 19 на 18 пратенички мандати, израмнувајќи се со СДСМ. Вреди од 13 се зголеми на 14 пратенички места. Денеска се прегласуваше и на шест избирачки места во петтата изборна единица, кои не донесоа измени во распределбата на пратеничките мандати. Коалицијата предводена од ВМРО-ДПМНЕ остана на 58 пратеници, коалициите на СДСМ и ДУИ имаат по 18, Вреди 14, Левица 6 и ЗНАМ 6.
