Девојка е задржана на болничко лекување по физички напад во Охрид, а полицијата го уапсила нејзиниот 31-годишен партнер Х.К. од градот.
Од СВР Охрид потврдија дека осомничениот бил уапсен утрово, 15 ноември, во 5:05 часот, по претходна пријава дека физички ја нападнал својата девојка. По документирањето на случајот, против него ќе биде поднесена соодветна кривична пријава.
Според првичните медиумски информации, нападот се случил во автомобил, каде девојката била удирана додека не изгубила свест. Потоа била оставена во близина на маркет и пренесена во болница. Околностите и точниот тек на настанот треба да ги утврдат надлежните органи.
Според неофицијалните информации на „Слободен печат“, девојката е хоспитализирана во здравствена установа за коскено-зглобни заболувања во Охрид. Медиумот наведува и дека осомничениот претходно ѝ го скршил мобилниот телефон.
Засега нема официјална потврда за видот и тежината на повредите, ниту за нејзината моментална здравствена состојба.
