Четири лица кои беа повредени во катастрофалниот пожар во дискотеката „Пулс“ во Кочани, денеска се враќаат во земјава, информира Министерството за здравство. Станува збор за двајца пациенти кои се лекуваа во Хрватска, еден во Шведска и еден во Италија.
– Во странство сè уште се хоспитализирани 60 пациенти. Состојбата на сите, вклучително и на критичните случаи, останува непроменета – соопштуваат од Министерството.
Во македонските болници моментално се лекуваат седум пациенти: четворица на Клиниката „Свети Наум Охридски“, двајца во приватната болница „Систина“ и еден на Клиниката за пулмологија.
Министерството за здравство нагласува дека внимателно ја следи состојбата со сите повредени, обезбедувајќи соодветна здравствена грижа и рехабилитација.
Пожарот во дискотеката „Пулс“ се случи на 16 март во раните утрински часови, при што животот го загубија 61 лице, а околу 200 беа повредени. Трагедијата остави длабоки последици и сè уште е предмет на истрага и јавна реакција.
