Владата на Република Бугарија го одобри нацрт-договорот со Северна Македонија за изградба и работа на прекуграничниот железнички тунел „Деве Баир“, пренесува бугарската агенција БТА.
Целта на договорот е да се постават јасни обврски и рокови за изградба на железничката пруга меѓу двете земји. Според БТА, ќе се формира мешовит комитет кој ќе преговара со македонската страна за деталите околу текстот на договорот.
Пред две недели, бугарското Министерство за транспорт предложи потпишување на меѓувладин договор за да се прецизираат сите аспекти околу изградбата на пругата.
Изградбата на пругата кон Бугарија неодамна беше доведена во прашање откако вицепремиерот и министер за транспорт на Северна Македонија, Александар Николоски, се спротивстави на продолжувањето на третата делница (Крива Паланка – Деве Баир). Николоски ја обвини Бугарија дека нема подготвен проект за Коридорот 8, со што, според него, се успорува процесот на изградба.
