Обвинителот Гаврил Бубевски побара Сашо Мијалков, Мендух Тачи и ексчленовите на Државната изборна комисија да бидат огласени за виновни во случајот „Титаник 2“, предмет што се однесува на изборни нерегуларности. Бубевски побара секој од обвинетите да одговара според степенот на кривичното дело.
„Бараме да ги огласите за виновни и да ги казните за стореното кривично дело ценејќи ги сите отежнувачки и олеснувачки околности“, рече обвинителот.
За секого одделно, Бубевски посочи отежнувачки и олеснителни околности. За ексчленовите на ДИК, посочи дека не се водат други постапки, не се осудувани, што се околности за поблага казна. Но, според Бубевски, злоупотребата на нивното знаење и незаконитостите што ги правеле пред очите на јавноста – се отежнувачки околности.
Обвинителот за Мендух Тачи рече дека судот треба да цени: „Како отежнувачка околност се директната умисла поттикнување и околностите. Треба да се акцентира неговото почитување на судот и на Обвинителството“.
Бубевски посочи дека и кај ексдиректорот на УБК има отежнувачки и олеснителни околности: „Кај Мијалков отежнувачка околност е степенот на кривична одговорност, побудите зошто го сторил кривичното дело, фактот што против него се водат други кривични осуди, како и тоа што има правосилна пресуда. Треба да се земе предвид неговото културно однесување, почитувањето на судот“.