Шефот на американската дипломатија, Ентони Блинкен, вчера, на средба со израелскиот министер за одбрана изјави дека САД се противат на офанзивата во Рафа.
Блинкен нагласи дека „постојат други решенија, освен копнена инвазија од големи размери, која подобро ќе ја обезбеди безбедноста на Израел и ќе ги заштити палестинските цивили“, рече портпаролот на Стејт департментот, Метју Милер.
Средбата меѓу Блинкен и израелскиот министер за одбрана, Јоав Галант, се одржа вчера во Вашингтон, истиот ден кога израелскиот премиер Бенјамин Нетанјаху ја откажа посетата на високо ниво на израелска делегација на САД. Ова беше реакција на воздржувањето на САД од резолуцијата на Советот за безбедност на ОН, која повикува на итен прекин на огнот во Газа.
„Сигурен сум дека ќе најдеме други начини да ја изразиме нашата загриженост за офанзивата, која би претставувала огромен ризик за цивилите“, изјави вчера портпаролот на Стејт департментот.
Според него, израелската влада не претставила кохерентен план за евакуација на 1,4 милион луѓе во Рафа. Повеќето од нив побараа засолниште таму откако избегаа од бомбардирањето во северниот дел на Газа.
И германската министерка за надворешни работи, Аналена Баербок, во друга посета на Блискиот Исток го повтори повикот до Израел да се откаже од офанзивата.
„Не смее да има офанзива од големи размери на Рафа“, рече Баербок вчера во Каиро по состанокот со својот египетски колега Самех Шукри.
Хамас во текот на ноќта изјави дека „Нетанјаху и неговата екстремистичка влада сносат целосна одговорност за неуспехот на преговарачките напори“.
Палестинската исламистичка група бара „вистинска размена на затвореници“, односно ослободување на палестинските затвореници од израелските затвори во замена за израелските заложници во Газа.
