„Американскиот претседател Џо Бајден разговараше со израелскиот премиер Бенјамин Нетанјаху и го повтори својот јасен став за можната инвазија на пограничниот град Рафа“, соопшти Белата куќа.
Во соопштението за печатот на Белата куќа не се откриени деталите од тој разговор. Вашингтон соопшти дека не може да ја поддржи операцијата во Рафа без соодветен хуманитарен план.
Претходно, портпаролот на Белата куќа за национална безбедност Џон Кирби изјави дека Израел се согласил да ги послуша американските грижи и идеи пред да започне инвазија. Двајцата лидери последен пат разговараа телефонски на 13 април, откако Иран изврши ракетен и беспилотен напад врз Израел.
„Претседателот ја потврди својата цврста посветеност на безбедноста на Израел“, се вели во соопштението.
Бајден и Нетанјаху разговараа и за преговорите што треба да обезбедат ослободување на некои од заложниците кои се држат во заробеништво од 7 октомври, заедно со договор за прекин на огнот во Газа. Тие разговараа и за забрзаната испорака на хуманитарна помош, вклучително и подготовките за отворање нови премини во Газа.
„Претседателот ја истакна потребата од продолжување и подобрување на овој ритам во целосна соработка со хуманитарните организации“, се вели во соопштението.
