Димитар Апасиев, претседател на Левица, соопшти дека правниот тим на партијата за прв пат поднел специјална тужба – т.н. ACTIO POPULARIS – за заштита од дискриминација во јавен интерес.
Според Апасиев, тужбата се однесува на групна политичка дискриминација врз 978 потврдени кандидати на Левица за советници и градоначалници ширум Македонија. Тој нагласува дека на овие кандидати противуставно и противзаконито им е забрането платеното политичко рекламирање на телевизии, радија, интернет портали, весници и билборди.
„На потег е Основниот граѓански суд – Скопје. Во спротивно, се гледаме пред Стразбур“, напиша Апасиев на својот фејсбук профил, додавајќи дека Уставниот суд, како по обичај, е паднат од Марс и не е оттука.
