Берово, 8 мај 2020 (МИА) – Во Берово се одржа првиот состанок за спроведување на проектната активност за мапирање на потенцијалот на планинарските патеки и нивно ставање во функција на мрежно поврзан систем за планински рекреативен туризам на Малешевските Планини.
Проектот, како што информираа учесниците е дел од регионалното управување со шумите и потенцирање на другите функции на шумата, при што главни партнери во спроведување на оваа активност се општините Берово и Пехчево, заедно со локалните подружници на Јавното преттпријатие „Национални шуми“.
-Проектот има за цел воспоставување на унифициран систем на мапирани, обележани, атрактивни, пристапни и функционални пешачки, велосипедски и друг вид на туристички патеки на Малешевските Планини. На првиот состанокот одржан како дел од проектот беа презентирани главните активности и очекувани резултати, кои треба да се реализираат до крајот на годината, со партиципативен пристап и активна вклученост на сите локални заинтересирани страни, информираа учесниците во проектот од двете општини.
Според нив во рамки на активностите предвидено е да се мапира мрежа на пешачки, велосипедски и друг вид на туристички патеки, со вкупна должина од 80 километри со развој на минимум осум радијални и две трансверзални патеки.
-Патеките ќе бидат со комплетна унифицирана сигнализација, развој на бренд, изработка на студија за развој на активен туризам, изработка и печатење на туристичка топографска мапа и водич, како и андроид мобилна апликација. Воедно ќе бидат организирани промотивни настани за домашни и странски тур оператори, додадоа координаторите во проектот.
Проекот „Мапирање на потенцијалот на патеки на планина и ставање во функција на мрежно поврзан систем на патеки за планински рекреативен туризам на Малешевските Планини (Берово и Пехчево)“, се спроведува во рамки на Програмата за зачувување на природата во Северна Македонија-фаза 2 и е проект на Швајцарската агенција за развој и соработка (SDC), коодриниран од Фармахем. вс/нд/
