Скопје, 18 март 2020 (МИА) – Министерот за здравство Венко Филипче ја поздрави одлуката на претседателот Стево Пендаровски да прогласи вонредна состојба поради ситуацијата со коронавирусот. Сега Владата ќе може брзо и ефикасно да управува со ресурсите на државата и навремено да реагира на предизвиците кои ни претстојат и на здравствен и на економски план, објави Филипче на фејсбук, давајќи и куси појаснување за неколку прашања поврзани со постапувањето во услови на вонредна состојба.
– Што значи вонредна состојба? Вонредна состојба значи дека Владата добива и Законодавна и Извршна власт. Со тоа, се олеснува работата на Владата во време на кризи и истата може да носи одлуки за добро на граѓаните многу побрзо и поефикасно.
– Како Владата го прави тоа? Преку носење на Уредби со сила на закон, кои важат само додека трае вонредната состојба.
– Дали ќе има полициски час или ограничување на движењето? Во овој момент нема таква одлука, следете ги сите понатамошни одлуки на Владата и ќе бидете информирани за евентуални ограничувања на движење.
– Дали треба да направам резерви на храна? Не, во државата има доволно резерви и на храна. Останете во своите домови, не излегувајте доколку немате потреба и купувајте онолку колку што ви треба, наведува министерот Филипче и апелира до граѓаните да се придржуваат до мерките и препораките, зашто само тако побрзо и полесно ќе се надминеме оваа состојба.са/
