Затвореник кој бил спроведен од штипскиот затвор на судење во Основниот суд во Струмица успеал да избега за време на пауза во судската постапка.
Според информациите, затвореникот во моментот на инцидентот бил под надзор на двајца припадници на затворската полиција. За време на паузата побарал дозвола да оди во тоалет, а при излегувањето го турнал едниот од полицајците и веднаш се дал во бегство.
И покрај тоа што на рацете имал лисици, затвореникот успеал да им побегне на полициските службеници и да се оддалечи од судот.
По бегството веднаш биле известени Министерството за внатрешни работи и Јавното обвинителство, а полицијата презема мерки за негово пронаоѓање и повторно лишување од слобода.
Во штипскиот затвор, пак, е формирана комисија која треба детално да ги испита околностите под кои дошло до бегството и да утврди дали имало пропусти во постапувањето на затворската полиција.
Се очекува по завршувањето на внатрешната постапка да биде познато дали и каква одговорност ќе има за службените лица задолжени за спроводот и обезбедувањето на затвореникот.
