Основниот суд во Гевгелија му изрече доживотна казна затвор на 40-годишниот Петар Станковски од Богданци, кој беше обвинет за свирепото убиство на својата мајка, извршено во јануари годинава.
Трагичниот настан се случил на 11 јануари во стан во Богданци, каде што мајката и синот живееле како потстанари. Според обвинението, по расправија поврзана со неговото лекување, Станковски ја нападнал својата мајка со нож и ножици, нанесувајќи ѝ повеќе смртоносни повреди.
По извршувањето на кривичното дело, обвинетиот сам се пријавил во полиција.
Од Основниот суд во Гевгелија соопштија дека првостепената пресуда е донесена откако обвинетиот ја признал вината пред судот. Тој беше гонет за кривично дело „убиство на свиреп начин при семејно насилство“, едно од најтешките кривични дела предвидени во Кривичниот законик.
До правосилноста на пресудата, Петар Станковски останува во притвор. Случајот ја потресе јавноста поради бруталноста на злосторството и фактот дека жртвата е неговата мајка.
