Во Монголија, претставници од 56 држави првпат ќе го прослават Светскиот ден на коњот на меѓународно ниво, објави државната новинска агенција, пренесе БТА.
На пленарната сесија на 79. заседание на Генералното собрание на ООН на 3 јуни 2025, беше дискутирана и усвоена резолуцијата за Светскиот ден на коњот, иницирана од претседателот на Монголија, Ухнаагиин Курелсух. Меѓународната одлука годишно да се прославува 11 јули како Светски ден на коњот служи како јасен израз на глобалното признавање на културното наследство на монголските номади и непроценливиот придонес на коњите во човековиот развој, според ООН.
Оваа година, 56 земји ќе го прослават Светскиот ден на коњот во согласност со нивните уникатни обичаи и традиции. Според документот на ООН, во списокот се и Бугарија, Србија, Хрватска, Русија, Турција, Кипар, Унгарија.
Од особено значење е што Монголија го одбележува овој историски меѓународен настан како главен центар. Прославата ќе вклучува меѓународни настани од голем обем коишто ќе ги обединат националните наследства, коњичките спортови, како и коњичката култура и уметност, на едно место.
