Пратеничката на СДСМ Славјанка Петровска преку објава на социјалните мрежи се осврна на реакциите што следуваа по нејзиното учество на иницијативата „Разговорите за Македонија“, нагласувајќи дека нејзиниот ангажман не е насочен против партијата, туку, како што вели, во интерес на нејзино обновување и зајакнување.
Таа посочи дека во изминатите денови добила бројни пораки и телефонски повици од граѓани, поддржувачи, пријатели, но и критичари, на кои им се заблагодари за, како што наведува, личната комуникација и подготвеноста за отворен разговор.
Во својата објава Петровска потсетува дека член на СДСМ станала пред 26 години и дека низ целиот свој политички ангажман останала верна на партијата, без оглед на изборните победи и порази.
Таа наведува дека активно учествувала во сите значајни политички процеси и изборни циклуси на СДСМ, почнувајќи од работата во Социјалдемократската младина, преку парламентарните, претседателските и локалните избори, па сè до периодот на опозициската борба, протестите и настаните поврзани со политичката криза во државата.
Петровска истакнува дека останала во партијата и во најтешките периоди, кога, според неа, многумина се дистанцирале од политиката, нагласувајќи дека била дел од активностите за време на објавувањето на „Вистината за Македонија“, протестите пред Владата, како и настаните од 24 декември 2012 и 27 април 2017 година.
Во објавата потсетува и на својата политичка кариера, наведувајќи дека првата партиска функција ја добила во 2024 година како претседавач на Централниот одбор на СДСМ, а претходно била дополнителен заменик-министер за внатрешни работи, пратеничка и министерка за одбрана.
Таа вели дека во 2024 година се кандидирала за претседател на СДСМ со програмата „Манифест за социјалдемократијата“, но се повлекла поради, како што наведува, прекршување на принципите и правилата во изборниот процес. И покрај тоа, додава дека продолжила да ги брани ставовите на партиското раководство и да работи во интерес на СДСМ.
Петровска открива дека на партиските органи предложила ветинг за пратениците и раководството, како и измени на Статутот со цел поголема моќ во одлучувањето да добие членството, но, според неа, на тие иницијативи не добила одговор.
„Моето учество во Разговорите за Македонија не е против СДСМ, туку за СДСМ. Затоа што јас сум социјалдемократ и по убедување и по дејствување“, наведува Петровска.
На крајот од својата објава таа ја цитира Еленор Рузвелт: „Големите умови дискутираат за идеи; просечните умови разговараат за настани; малите умови разговараат за луѓето.“
