Сојузот на синдикати на Македонија (ССМ) најавува масовен работнички протест на 1 мај, со кој годинава ќе се одбележи Меѓународниот ден на трудот.
Под мотото „Се бориме за зголемување на платите, а не се молиме“, синдикатот ги повикува граѓаните да се приклучат на протестот што ќе започне во 11 часот пред Работничкиот дом. Главното барање останува исто – зголемување на минималната плата, но и раст на сите останати примања во согласност со зголемените трошоци за живот.
Од ССМ посочуваат дека сегашното законско усогласување на платите, кое изнесува околу 1.600 денари, не е доволно за да го следи растот на цените. Според нивните пресметки, трошоците за живот од почетокот на годината се зголемени за најмалку 2.500 денари, што дополнително го оптоварува буџетот на граѓаните.
