Премиерот Христијан Мицкоски упати апел до јавноста за внимателност во однос на пораките од синдикалните организации, обвинувајќи дел од нивното раководство за директна поврзаност со опозицијата и политичка манипулација. По повод најавениот протест на Сојузот на синдикати на Македонија (ССМ), тој истакна дека Владата целосно го почитува Законот за минимална плата, според кој таа наскоро ќе надмине 26.000 денари.
Мицкоски нагласи дека Владата не е вистинската адреса за барањата за драстично зголемување на минималната плата, туку тоа прашање треба да се реши преку бипартитен дијалог помеѓу работниците и работодавачите, објави 4news.mk Според него, доколку овие две страни постигнат консензус, Владата е подготвена да го поддржи таквиот договор. Премиерот дополнително ги критикуваше синдикалните претставници за контрадикторно однесување — од фалење на владините политики при потпишување колективни договори, до блокирање на сообраќајот во Скопје следниот ден. Тој ги отфрли пресметките за потрошувачката кошница како нереални, тврдејќи дека тие се користат за креирање политички хаос наместо за реална заштита на работничкиот стандард.
