Десетина возила учествувале во три одделни сообраќајни незгоди што се случиле во краток временски период на автопатот Тетово–Гостивар, на делницата кај таканаречената „Неготинска клучка“.
Според првичните информации од надлежните служби, во незгодите е потврдено дека едно лице се здобило со повреди, но засега нема податоци за потешки последици. Поради настаните, сообраќајот на овој дел од автопатот се одвива забавено и со повремени застои.
Портпаролот на СВР Тетово, Фатмир Реџепи, информира дека полициски екипи се на терен и работат на расчистување на коловозот и целосна нормализација на сообраќајот.
Како најверојатни причини за сообраќајните незгоди се наведуваат неприлагодената брзина на движење и појавата на голомразица, а незгодите се случиле на блиска оддалеченост една од друга.
Надлежните апелираат до возачите на зголемена внимателност и прилагодување на брзината кон условите на патот, особено во утринските и вечерните часови кога има ризик од поледица.
