Во светот денес 40,8 милиони луѓе живеат со ХИВ, а во 2024 година се забележани 1,3 милиони нови инфекции. Според УНАИДС, 9,2 милиони сè уште немаат пристап до третман. Новиот извештај предупредува дека глобалниот одговор на ХИВ бележи најголем пад во последните децении поради намалено финансирање и недостиг на солидарност.
Извршната директорка Вини Бјанима вели дека кризата го загрозува тешко постигнатиот напредок и ги остава најранливите без услуги. Особено погодени се младите жени, во 2024 година секој ден имало по 570 нови инфекции кај девојчиња и жени од 15 до 24 години. Многу програми за превенција се укинати, а над 60% од организациите предводени од жени ги суспендирале своите активности.
УНАИДС предупредува дека неисполнувањето на целите за 2030 година може да донесе уште 3,3 милиони нови инфекции. Паралелно се зголемува и криминализацијата на ЛГБТИ-заедницата, што дополнително го ограничува пристапот до услуги. Агенцијата повикува на обновена глобална солидарност и итна акција за да се спречи враќање на епидемијата.
