Полска прогласи дводневна национална жалост по вооружениот напад во центарот на Краков, во кој загинаа шест лица, а најмалку 15 беа повредени. Премиерот Доналд Туск го оцени нападот како терористички чин.
Националната жалост важи денеска и утре, 8 и 9 ноември, со одлука на претседателот Карол Навроцки. Државните знамиња се спуштаат на половина копје во знак на почит кон жртвите.
Нападот се случил во саботата, нешто по 15 часот, во историскиот центар на Краков. Според информациите од градските власти и полицијата, напаѓачот пукал од автомобил, а меѓу погодените објекти бил и трамвај. Во него немало повредени патници.
Меѓу шестемина загинати се четири жени и двајца мажи. Полицајците го раниле и го уапсиле напаѓачот, за кого е потврдено дека е полски државјанин.
При претрес во неговиот дом биле пронајдени уште три тела. Туск изјави дека постојат силни индиции оти станува збор за членови на најблиското семејство на осомничениот. Властите ги истражуваат и неговите можни врски со крајнодесничарска идеологија.
„Така мора да го наречеме овој суров напад врз животите на луѓето во Краков“, рече Туск, образложувајќи зошто го квалификува настанот како тероризам.
Во Краков локалната жалост ќе трае до 11 ноември. Откажани се настаните организирани од градот и градските институции, а на официјалната интернет-страница е најавена и виртуелна книга на жалост.
