Во рамки на истрагата за трагедијата во Пулс во Кочани, Обвинителството покрена постапки против повеќе лица за низа кривични дела поврзани со корупција, злоупотреби и фалсификати. Дел од осомничените се лишени од слобода, а за неколкумина обвинителството, според информациите на МКД.мк, ќе бара и мерка притвор. Се работи за лица вработени во Управата за јавни приходи и Државниот пазарен инспекторат.
Според МКД.мк притвор ќе биде баран за Драганчо Паунов, вработен во УЈП Штип, кој се сомничи за кривични дела примање поткуп по член 357 од Кривичниот законик и оддавање службена тајна по член 360. Тој е од Штип и е лишен од слобода. Мерка притвор ќе биде побарана и за Дуле Димитриев, исто така од Штип и вработен во УЈП Штип, осомничен за примање поткуп по член 357 и примање награда за противзаконито влијание по член 359 од КЗ. И тој е лишен од слобода.
За делата давање поткуп по член 358 и давање награда за противзаконито влијание по член 358-а, осомничен е Михаил Јованов, а постапка е покрената и против Драган Чурлинов за две кривични дела – злоупотреба на службената положба и овластување по член 353 и фалсификување службена исправа. Тој живее во Гевгелија.
Атанас Чурлинов, исто така од Гевгелија и вработен во УЈП Струмица, се сомничи за злоупотреба на службената положба и овластување по член 353 и фалсификување службена исправа по член 361. Тој е лишен од слобода.
Лишен од слобода е и Алки Караманолев од Струмица, вработен во УЈП Струмица, осомничен за истите две кривични дела – злоупотреба на службената положба и овластување по член 353 и фалсификување службена исправа по член 361, објави МКД.мк.
Според МКД.мк постапка се води и против Александра Чичанова од Валандово, вработена во УЈП Струмица, за истите две дела – злоупотреба на службената положба и овластување по член 353 и фалсификување службена исправа по член 361. Во УЈП Штип е осомничен и Никола Тушев кој е лишен од слобода за злоупотреба на службената положба и овластување по член 353.
За истото дело е осомничен и Александар Кангалов, исто така од Штип и вработен во УЈП Штип. И тој е лишен од слобода.
Во Пулс Кочани, за фалсификување исправа по член 378 став 4 од КЗ, осомничен е Д. Ј.
Обвинителството продолжува со прибирање докази во рамки на истрагата поврзана со трагедијата во Пулс. Вчера почна судењето против 35 физички и три правни лица обвинети за трагедијата, а спроведена е и истрага за 13 полициски службеници, за кои обвинение треба да биде поднесено следниот месец, објави МКД.мк.
