Дел од средновековна кула во центарот на Рим денеска се урна при што едно лице е сериозно повредено, јави новинската агенција АНСА.
Инцидентот се случил во историската кула од 13 век, Торе деи Конти (Torre dei Conti), која се наоѓа во фаза на реновирање. Кулата се наоѓа во близина на Царските форуми и Колосеумот, кои се популарни туристички атракции.
Повредениот е градежен работник, според медиумските извештаи кои ги цитира ДПА. Тројца други работници првично биле заробени на горното ниво, но биле спасени со помош на подвижна скала. Сепак, се верува дека уште еден градежен работник сè уште е во зградата.
Paura in centro a #Roma, vicino ai Fori imperiali. Intorno alle 11.20 è crollata parte della Torre dei Conti in largo Corrado Ricci, attualmente in ristrutturazione. Secondo le prime informazioni ci sarebbero delle persone bloccate sotto le macerie.#Tg1 pic.twitter.com/Xj43qlQUqH
— Tg1 (@Tg1Rai) November 3, 2025
Очевидци пријавиле дека слушнале силен тресок проследен со облак од прашина во тесните улички околу областа. Веднаш по делумното уривање, противпожарната бригада и полицијата го блокирале целиот простор за пешаци и автомобили за да им овозможат на службите за итни случаи да ја извршат својата работа.
Додека противпожарната бригада сè уште работела, се урнал уште еден дел од кулата, предизвикувајќи облак од прашина. Пожарникарите на подвижната скала успеале навреме да се симнат и да се засолнат.
Торе деи Конти била изградена во 13 век за време на понтификатот на папата Инокентиј Трети. Кулата, која сега е висока 29 метри, некогаш била висока околу 50 до 60 метри. Меѓутоа, горните катови биле оштетени од серија земјотреси во 14 и 17 век и подоцна урнати. Зградата е непогодна за живеење и напуштена веќе некое време.
