Индиската влада вечерва потврди дека нејзините сили спровеле воена операција на вкупно девет локации во Пакистан и пакистанскиот дел на Кашмир. Операцијата, наречена „Синдор“, имала за цел, како што се наведува, „терористички објекти од кои биле планирани и извршени напади врз Индија“.
„Нашите акции беа насочени, измерени и не ескалираа по природа. Ниту една пакистанска воена база не беше цел на нападот. Индија покажа значителна воздржаност во изборот на цели и начинот на спроведување на операцијата“, се вели во соопштението на индиската влада.
Според властите во Њу Делхи, нападите биле одговор на минатомесечниот смртоносен напад врз туристи во индискиот дел на Кашмир. Индија го обвинува Пакистан за поддршка на прекуграничниот тероризам – обвинување што Исламабад остро го негира.
