Советот за безбедност на Обединетите нации едногласно усвои нови, потранспарентни процедури за стотици поединци, компании и други субјекти кои се под санкции на ОН и сакаат да бидат отстранети од црните листи.
По гласањето, заменик-амбасадорот на САД во ОН Роберт Вуд ова го оцени како историски момент, бидејќи постапката за бришење не е променета 18 години.
-Санкциите на Советот за безбедност се важна алатка за одвраќање на заканите за мирот и безбедноста, од ширење на оружје за масовно уништување до спротивставување на тероризмот и спречување на кршење на човековите права, рече Вуд.
Тој истакна дека санкциите мора да бидат насочени и дека мора да има „цврсти и правични процедури за бришење од списокот кога тоа е оправдано“.
Резолуцијата, спонзорирана од Малта и Соединетите Американски Држави, го овластува и формирањето на нова неформална работна група од страна на Советот за безбедност за да ги испита начините за подобрување на ефективноста на санкциите на ОН.
Резолуцијата овластува нова „точка на контакт“ која директно ќе комуницира со оние кои сакаат да бидат отстранети од списоците за санкции и ќе собира информации од различни извори за да ги сподели со Комитетот на Советот за безбедност што ги надгледува санкциите и донесува одлуки за бришење.
Исто така, бара причината за одлуката на комисијата да му се достави на апликантот.
