Претседателот на Движењето БЕСА и градоначалник на Тетово Биљал Касами, кој на парламентарните избори беше кандидат за пратеник од Коалицијата ВРЕДИ, до Собранието доставил изјава дека се откажува од пратеничкиот мандат и бара да не му биде верифициран. -Јас Биљал Касами како избран кандидат за пратеник во Шестата изборна единица на Парламентарните избори 2024, при чиста совест и здрав разум, неприсилен од никого, под целосна морална, материјална и кривична одговорност, изјавувам дека се откажувам од пратеничкиот мандат и барам да не ми се верифицира мандатот од страна на Собранието на Република Северна Македонија, стои во изјавата на Касами потпишана со датум 23 мај 2024 година. На првата седница на новиот парламентарен состав што е закажана за утре со почеток во 11 часот, прва точка на дневен ред е избор на претседател и членови на Верификациската комисија на Собранието. На седницата треба да се изврши верификација на мандатите на пратениците, да се изберат претседател, заменик на претседателот, членови и нивни заменици на Комисијата за прашања на изборите и именувањата, како и претседател на Собранието.
Касами се откажа од пратеничкиот мандат
