Стотици летови од француските аеродроми ќе бидат откажани што значително ќе го наруши воздушниот сообраќај и патувањето во Европа во наредните денови.
Француските власти не успеаја да постигнат договор и да избегнат штрајк на контролорите на летање, па се очекува тој да влијае значителен дел од Европа.
Откажувањата и доцнењата ќе влијаат на голем дел од Европа, а француските власти бараат од авиокомпаниите да откажат три четвртини од летовите од парискиот аеродром Орли и 55% од аеродромот Шарл де Гол, како и две третини од летовите до Марсеј, објавија агенциите.
– Француските контролори на летање имаат право на штрајк, но ние треба да ги откажеме француските летови, а не патувањата од Ирска до Италија, од Германија до Шпанија или од Скандинавија до Португалија – изјави директорот на Рајанер, Мајкл О’Лири.
Поради штрајкови на контролорите, минатата година во Европа беа откажани 16.000 летови, додека 85.000 беа одложени.
Патниците се предупредуваат навреме да го проверат распоредот на летање и да се запознаат со можните промени.
