Новиот министер за одбрана на Украина, Рустем Умеров денеска изјави дека ќе ја врати контролата „на секој сантиметар од украинската земја“ од Русија и дека ќе ги врати дома сите затвореници.
Во својот прв говор во Парламентот на Украина како новоизбран министер за одбрана, тој рече дека „ќе направи се што е можно и невозможно Украина да победи“, пренесе Си-ен-ен.
„Четириесет и два милиони Украинци стојат зад секој војник. Зад секој војник стои Министерство кое ќе направи се за да го заштити и обезбеди целиот наш народ. Нашиот народ, нивниот живот и достоинство се наш приоритет и најголема вредност“, рече тој.
Парламентот на Украина денеска го одобри назначувањето на Умеров за министер за одбрана, бидејќи претседателот на Украина Володимир Зеленски во неделата најави разрешување на поранешниот министер Олексеј Резников, кој потоа поднесе оставка до Парламентот.
Умеров (41) е кримски Татар, турска група сунитски муслимани чија татковина е полуостровот Крим, кој беше анектиран од Русија во 2014 година, пишува Ал Џезира.
Умеров започна во приватниот сектор. Тој се приклучи на еден од водечките украински мобилни оператори во 2004 година.
