Лидерот на ВМРО-ДПМНЕ, Христијан Мицкоски, денеска, по разговорите со Манфред Вебер, претседател на Европската народна партија, ги повтори старите ставови дека „ВМРО-ДПМНЕ нема да прифати никаков договор кој ќе биде под бугарски диктат“.
Тој рече дека целта на разговорите на вмровската делегација, во која се и потпретседателите Александар Николоски и Тимчо Муцунски, е ВМРО-ДПМНЕ да ги „презентира своите позиции, аргументи и ставови поврзани со проблемот што го создала Владата на ДУИ подржана од СДСМ“, а бил изненаден што во Брисел слушнал дека претставниците на власта ја кодошеле опозицијата.
„Она што најмногу зачудува, а што го слушнав овде во Брисел од соговорниците, е дека нашите членови на македонската Влада, кои кога доаѓаат во Брисел, ние мислиме работат за државата, а тие покрај тоа што го уживаат комфорот на своите функции, единствената работа и цел им е да ја кодошат опозицијата овде во Брисел и да бараат од луѓето од Брисел да вршат притисок врз ВМРО-ДПМНЕ да прифати договор кој ниту го преговарала ниту учествувала во него, а предупредила дека нема намера да го прифати“, вели Мицкоски.
Тој рече дека мора итно да има избори за да биде ослободено општеството.
„Потребни се избори за да дојде една легитимна влада, која е избрана од народот, а не поставена како оваа Влада на Ковачевски“, додаде Ковачевски.
Тој повтори дека нема прифаќање бугарски диктат и дека се потребни избори побргу за да може да има легитимна влада, која ќе биде предводник на еден реформски процес.
