Али Ахмети ми е вујко и Бог да го благослови, тој ми е мотивација во мојот живот, рече неговиот внук Дрин Ахмети на прес-конференцијата за трговскиот центар „Соравија“, а прашан дали лидерот на ДУИ имал влијание.
Дрин кажа дека не сака да коментира политички изјави, но зборуваше за Ахмети и Љубчо Георгиевски.
„Ахмети и помогна на оваа држава. Немаше да ја имаме Македонија денес ако го следевме Љубчо Георгиевски да ја дели државата. Али Ахмети не го потпиша тоа и вие не го цените доволно. Не сум тука да коментирам политички изјави. Горд сум да го имам за вујко, но тој нема ништо со мојот бизнис. Нула. Ова што го прават медиумите сега, прави штета на мојата мрежа на соработници. Луѓе од Америка ме прашуваат што ти се случува со македонските медиуми, ти правиш се’ по прописи“, рече Дрин Ахмети, додавајќи дека да се случело тоа во САД, со медиумите би се објасниле на суд.
Потоа кажа дека само еден новинар го прашал за купувањето на „Соравија“ и тој му одговорил, а одговорот бил скратен.
Прашан каде живеел и работел бидејќи не знае македонски и од кога се занимава со бизнис, младиот бизнисмен прашањето го оцени како „приватно прашање“.
„Живам во Македонија. Многу луѓе, особено луѓето со кои што работам зборуваат англиски јазик. Имам 85 проценти од вработените кои се етнички Македонци, и тие говорат англиски јазик. Не гледам проблем во тоа, Мислам дека младите луѓе не ги засега оваа тема. Учат албански, учат јазици ако им помагаат во кариерата“, рече Дрин заклучувајќи дека парите и капиталот немаат етничка припадност.
