Најмалку 32 мигранти загинаа утрово кога бродот што ги превезувал се превртел и потонал во близина на брегот на Грција во меѓународните води кај Пелопонез, соопшти грчката крајбрежна стража.
Властите соопштија дека се спасени сто луѓе.
Тоа е најголемиот бродолом на мигранти во близина на Грција оваа година, објави „Ројтерс“.
Истрагата на крајбрежната стража е во тек, а според достапните информации, на рибарскиот брод, долг 30 метри, во моментот на неговото превртување во близина на градот Пилос имало најмалку 400 лица поради што се стравува дека стотици луѓе се водат како исчезнати, пренесува „Катимерини“.
Досега се спасени вкупно 104 мигранти. Четворица со симптоми на хипотермија се пренесени со хеликоптер во болница во Каламата, а другите се префрлени во пристаништето.
Грчките власти веруваат дека рибарскиот брод, кој пловел за Италија, тргнал од Тобрук, Либија.
