Во текот на денешниот ден 27 од 28 ученици од една од паралелките на ОУ Строжанац во Хрватска не се појавиле на час поради проблематично однесување на еден ученик, пишува порталот Далматински. Незадоволните родители тврдат дека нивните деца страдаат од страв, мачнина, главоболки и несоница поради овој ученик. Ја обвинуваат и директорката Жана Призмиќ и стручните служби дека нема итна реакција.
Вработен во училиштето изјавил дека проблемите во однесувањето на момчето се присутни подолго време. Момчето континуирано ја прекинувало наставата и било склон на насилни испади. Ситуацијата ескалирала минатиот четврток на часот по германски.
„Ученикот пристигнал во училницата со железна шипка и се заканил дека ќе биде следниот Коста К. Наставничката за инцидентот дознала од мајката на детето, која била сведок на се. Таа во тој момент повикала полиција. Полицајци во цивилна облека интервенирале, му ја одзеле шипката и ја предале во училиштето додека да дојдат родителите“, вели вработената во училиштето.
