Со преименување на Денот на победата, 9 Мај, во ден на Европа, украинскиот претседател Володимир Зеленски засекогаш ги предаде своите предци, истакна денеска портпаролката на руското Министерство за надворешни работи.
Марија Захарова реагира на одлуката на украинскиот претседател на 9 мај во Украина да се слави денот на Европа.
„Со преименувањето на Денот на победата – 9 Мај, Зеленски засекогаш ги предаде своите предци, оние што се бореа во редовите на Црвената армија, оние што страдаа и беа мачени во концентрационите логори и оние што работеа за победа во заднината. Една за сите“, напиша Захарова на „Телеграм“.
Таа го нарече украинскиот претседател нова инкарнација на Јуда.
„Што може да биде полошо од непријател? Предавник, ете, на пример, Зеленски. Нова инкарнација на Јуда во 21 век. Фашистички соработници 80 години подоцна“, заклучи Захарова.
За потсетување, украинскиот претседател денеска потпиша указ врз основа на кој 9 мај во Украина ќе се одбележува како ден на Европа. Зеленски испрати и предлог до украинската Рада 8 мај да се прогласи за ден на сеќавање и победа над нацизмот во Втората светска војна.
„Свесен за европскиот идентитет на украинскиот народ, одлучив во Украина да го воведам денот на Европа, кој ќе се слави секоја година на 9 мај заедно со земјите од Европската Унија“, се наведува во декретот.
Во документот се истакнува дека одлуката е донесена „со цел да се зајакне единството на народите во Европа“, како и да се „обезбедат мир, безбедност и стабилност на европскиот континент“.
„Никогаш нема да го заборавиме придонесот на украинскиот народ во победата над нацизмот. И нема да дозволиме лага дека победата во таа војна можеше да се постигне без учество на која било земја или нација“, истакна Зеленски во видеопорака.
