Загина 34-годишен градежник од Турција при пад од скеле на градилиштето на „Лимак“ во центарот на Скопје. По падот, градежникот бил пренесен во комплексот клиники, каде што починал.
„На 2.5.2023, во 18.40 часот, во СВР Скопје било пријавено дека на објект во изградба на подрачјето на Центар повреди добил работникот Ф. А. (34) од Република Турција, со привремен престој во Скопје, кој бил пренесен во комплексот клиники ‘Мајка Тереза’ за укажување лекарска помош. Од добиените повреди Ф. А. нешто подоцна починал. Увид извршила екипа од СВР Скопје, а по наредба на јавен обвинител, телото на починатиот било дадено на обдукција“, соопшти МВР.
Неофицијално, откога починал, негови блиски луѓе направиле инцидент на Клиниката за трауматологија, ортопедски болести, анестезија, реанимација, интензивно лекување и ургентен центар. Не дозволувале телото да биде дадено на обдукција, па била повикана полиција. Полициските екипи со часови останале во Ургентниот центар за да воведат ред оти пред болницата се собирале блиски и колеги на загинатиот.
