И според „Транспаренси“ изборот на надзорот на Коридорите 8 и 10Д е „матен“, само на Јавното обвинителство (ЈО) му требаат месеци за да побара запирање на работите. Требаше да помине повеќе од еден месец како медиумите, граѓаните, стручната јавност и ВМРО-ДПМНЕ нотираат корупција во изборот на надзорот за изградба на Коридорите 8 и 10д за ЈО да каже дека води истрага, реагираат од ВМРО-ДПМНЕ во нивното денешно партиско соопштение.
„Наместо штури објаснувања, ЈО да побара запирање на работите на надзорот и да спроведе брза истрага, која ќе гарантира дека парите на народот не се раскрчмуваат со матни зделки, и ќе санкционира секаква нерегуларност Власта го компромитираше целиот процес со надзорот. Со амин на Груби фирма која до вчера произведувала долна облека сега ќе врши надзор над проект тежок милијарди. Истиот тој Груби сега е назначен за координатор на проектот, а надзорот за кој постојат бројни обвинувања непречено почна да наплаќа милиони од државна сметка. Затоа секое непостапување на ЈО само ќе го загрози државниот интерес и парите на граѓаните, и тоа исто како и целиот процес ќе бидат дел од ревизија по промена на власта“, велат од ВМРО-ДПМНЕ.
