Поголемиот дел од земјите на ЕУ се за воведување на тестирање за Ковид-19 пред заминувањето на патниците од Кина во ЕУ, објави Европската комисија.
По состанокот во вторникот на Комитетот за здравствена безбедност, советодавното тело на ЕУ составено од здравствени експерти од 27 земји на ЕУ, беше откриен заедничкиот пристап на ЕУ кон ова прашање, објави Ројтерс.
– Огромното мнозинство земји се за тестирање на патниците пред да патуваат – рече портпаролот на ЕК.
Комисијата подготви нацрт-предлог за нови мерки, кои вклучуваат препорака за носење маски на летовите од Кина, анализа на отпадните води од авионите кои доаѓаат од Кина, геномски надзор на аеродромите и зголемено ниво на внимателност на влезот во ЕУ.
Европскиот центар за превенција и контрола на болести минатата недела објави дека засега не препорачува мерки за патниците од Кина бидејќи варијантите на вирусот што циркулира во Кина веќе постојат во Европската унија, каде што се релативно голем број граѓани вакцинирани или прележале Ковид-19, пренесе Блиц.рс.
