Јужнокорејските власти го потврдија првиот случај на инфекција со амебата naegleria fowleri – позната и како амеба што го јаде мозокот.
Оваа амеба живее во почва и во топла вода и продира во човечкиот мозок преку носот, соопшти Корејската агенција за контрола и превенција на болестите.
Инфекцијата е потврдена кај починат пациент со церебрален менингитис, кој неодамна се вратил од странство, објави Корејската агенција за контрола и превенција на болестите на „Твитер“.
Пациентот бил на Тајланд четири месеци пред да се врати во Јужна Кореја, каде што починал по доживена главоболка, треска, повраќање, нејасен говор и други симптоми.
Главниот пат на инфекција со оваа амеба во повеќето случаи е човечки контакт со загадена вода.
Оваа опасна амеба може да предизвика ретка мозочна инфекција наречена примарен амебен менингоенцефалитис и обично е фатална, објави „Спутник“.
