Во буџетот за 2023 година обезбедивме пари, ќе има нов раст на пензиите и платите, рече претседателот Димитар Ковачевски на трибината на СДСМ вечерва во Тетово.
„Во буџетот за 2023 година обезбедивме пари за нов раст на пензиите и платите. Да, ќе растат пензиите и ќе расте и минималната плата. Со новата методологија што заедно ја договоривме новото зголемување е во март 2023 година. Пензиите ќе бидат зголемени вкупно 16 % за време на една календарска година за сите 330.000 пензионери. Пензионерите се почитувани, тоа се нашите родители, тоа се наши татковци и мајки, баби и дедовци“, рече Ковачевски.
Претседателот на СДСМ потсети дека со економските политики за наредната година Владата става акценти и на капиталните инвестиции.
„Капиталните инвесиции наредната година ќе бидат исто така во нашиот фокус за чија реализација се предвидени приближно 800 милиони евра. Пари за нови проекти, за патишта, за водоводи, за нови градинки и училишта, кои ќе се градат насекаде во државата и, секако, овде во Тетово“, рече претседателот на СДСМ, Димитар Ковачевски, вечерва во Тетово.
