Денеска, министерот за внатрешни работи Оливер Спасовски заедно со својот албански колега, Бледар Чучи, на заедничката меѓувладина седница помеѓу Република Северна Македонија и Република Албанија, потпишаа два акта со кои двете држави потврдуваат идна поинтензивна соработка и успех во заедничката борба со организираниот криминал, зацврстување на прекуграничната соработка и реализација на многу заеднички акции.
„Министерството за внатрешни работи на Република Северна Македонија и Министерството за внатрешни работи на Република Албанија, бележат одлична и успешна меѓусебна билатерална соработка која е на доста високо професионално, стратешко и оперативно ниво. Во рамки на оваа наша заедничка владина седница, денес, јас како Министер за внатрешни работи на Република Северна Македонија предложив 2 акти за потпишување. Првиот, Протокол помеѓу Министерството за внатрешни работи на Република Северна Македонија и Министерство за внатрешни работи на Република Албанија за начинот на вршење или спроведување на заеднички гранични проверки на заедничкиот граничен премин ЌАФАСАН/QAFË THANË. Вториот, Договор меѓу Влада на Република Северна Македонија и Совет на Министри на Република Албанија за формирање на заеднички работни тимови во областа на безбедноста. Овој Договор е предложен во насока на унапредување на меѓусебната соработка, особено во борбата против организираниот криминал. Спроведувањето на еден ваков меѓународен билатерален акт ќе придонесе кон сузбивање на опасности по безбедноста и ефективнa борба против меѓународниот организиран криминал преку безбедносното партнерство со помош на координирани активности”, изјави Спасовски.
Тој потенцираше дека, дополнително, со потпишувањето на Протоколот и Договорот, Република Северна Македонија и Република Албанија потврдуваат идна поинтензивна соработка и успех во заедничката борба со организираниот криминал, зацврстување на прекуграничната соработка и реализација на многу заеднички акции.
