Второ лето по ред, регистрацијата на играчите е најголем проблем на Барселона, најмногу поради стриктните правила за финансиски ферплеј на шпанската Ла лига, но и поради финансиските проблеми на каталонскиот клуб. Според шпанскиот новинар Жерард Ромеро, Барселона размислува за опцијата за тужба против шпанската лига поради овие проблеми.
Минатото лето, тие мораа да дозволат Лионел Меси да си замине откако не беа во способност да го регистрираат нивниот договор, а за регистрација на дел од играчите ги примораа капитените на клубот доброволно да се согласат за намалување на платите. Ова лето, по фантастичниот преоден рок, тие се најдоа во слична ситуација, откако уште не успеваат да го регистрираат Жил Кунде иако продадоа 25 отсто од „Барса студиос“ за 100 милиони евра. Потенцијалното заминување на Мемфис Депај и Пјер-Емерик Обамејанг може да го реши овој проблем.
Другите четири најдобри европски лиги немаат слични регулативи како во Шпанија, што предизвикува проблеми за Барселона, но и за неколку други клубови во Шпанија, како Валенсија.