Навистина не е разбирливо зошто пратениците на СДСМ се нервозни за објавените телефонски броеви на социјалните мрежи, велат од ВМРО-ДПМНЕ.
„Тие телефонски броеви и мобилни апарати им ги плаќа токму народот, истиот народ од кои тие се избрани“, потенцираат во нивното соопштение.
Телефонските броеви на народните избраници, според опозициската партија, не се тајна и треба секој граѓанин да ги има, бидејќи тие седат во Собранието токму заради народот.
„Пратениците на СДСМ не треба да бегаат од народот, а особено од прашањата зошто не е објавен протоколот кој министерот за надворешни работи Османи го крие и што содржи тој Протокол и какви гаранции има во предлогот за заштита на македонскиот идентитет“, прецизираат во информацијата од опозицискиопт ВМРО-ДПМНЕ.
Инаку во пресрет на утрешната пленарна седница на која се очекува ќе биде разгледуван францускиот предлог, на социјалната мрежа Твитер се појави слика со телефонските броеви на пратеници од редовите на СДСМ и од нивната коалиција.