Холивудскиот гигант „Волт Дизни ко“ во петокот најави дека Eternals, West Side Story и останатите филмови од 2021 година ќе се прикажуваат исклучиво во киносали пред да бидат достапни на стриминг, што е показател на доверба дека одењето во кино ќе се врати во нормала.
Одлуката е поттик за забавната индустрија во време кога големите филмови во текот на пандемијата дебитираат онлајн во исто време како и во киносалите.
Компанијата во текот на пандемијата експериментираше со прикажување на некои филмови на стриминг-услугатата „Дизни плус“ во исто време кога тие се прикажуваа во кината.
Кино-операторите внимателно набљудуваат како „Дизни“, кој доминираше на кино-благајните во последните години, ќе се справи со претстојниот план бидејќи Делта-варијантата на коронавирусот го забави враќањето на публиката во мултиплекси.
