Уште една добра, убава вест за македонските компании: од овој месец можат да учествуваат на јавните тендери на НАТО, соопшти денеска на прес-конференција, Димитар Ковачевски, член на Извршниот одбор на СДСМ.
Како што посочи тој, годишниот буџет за којшто може да конкурираат македонските компании е околу 5 милијарди евра.
„Членството во НАТО делува како катализатор за подобрување на економските потенцијали на земјите членки. Законските измени се веќе направени и стапени на сила за оваа нова, огромна можност за македонските компании“, истакна Ковачевски.
Според него, вистинските економски политики на Владата носат повеќе пари и подобар стандард за граѓаните.
„Извозот на стоки од Република Северна Македонија во првите шест месеци од годинава бележи раст од 39,1%, во однос на истиот период лани. Извезени се стоки во вредност од 3,4 милијарди евра. Дури и во криза, просечната плата континуирано расте и достигна 28.721 денари. Невработеноста успеавме драстично да ја намалиме на историски најсниски 16%, иако имаше сериозни предизвици“, порача претставникот на владејачката партија според кого овие економски показатели водат до заклучок дека Владата на СДСМ има добро осмислена економска политика.
