Водечкиот американски епидемиолог Ентони Фаучи ја повика Кина да објави медицински податоци за деветмина вработени во лабораторијата во Вухан, бидејќи тие можат да укажат на клучни траги дали Ковид-19 излегол од лабораторијата, објави „Фајненшл тајмс“.
„Би сакал да ја видам медицинската документација за три лица на кои им се слошило во 2019 година. Дали беа навистина болни и ако е така, што ги разболе“, рече Фаучи.
Потеклото на вирусот сè уште е спорно, а американските разузнавачки агенции ги испитуваат тврдењата дека истражувачите во лабораторијата за вируси во кинески Вухан се разболеле во 2019 година, еден месец пред да биде пријавен првиот случај на Ковид-19, пренесува „Ројтерс“.
Сепак, кинески научници и официјални лица ја отфрлаат тезата дека вирусот излегол од лабораторијата, наведувајќи дека тој можел да циркулира во други региони пред да пристигне во Вухан и дека можеби влегол во Кина преку увезена замрзната храна.
„Фајненшл тајмс“ наведува дека Фаучи верува дека вирусот најпрво бил пренесен од животно на човек, нагласувајќи дека дури и ако лабораториските истражувачи се заразиле со Ковид-19, тие можеле да бидат заразени од општата популација.
