Против 32-годишен жител на селото Дуф е поднесено обвинение поради кривично дело – насилство.
Како што информираат од гостиварското Основно јавно обвинителство, на 23 февруари во Вруток, обвинетиот извршил грубо насилство и телесно повредил едно лице, додека кај останатите присутни граѓани предизвикал чувство на несигурност и страв.
Оштетениот со својот автомобил се движел на регионалниот пат кај селото Вруток и во еден момент со рака му дал на обвинетиот право на првенство на минување.
Но, обвинетиот продолжил да го следи со своето возило, а на излезот од селото му го попречил патот, излегол од автомобилот, извадил дрво од багажникот и со него физички го нападнал оштетениот.
Притоа му нанел телесни повреди и му се заканил дека ќе го убие.
