Претседателката на Европската комисија, Урсула фон дер Лаен, објави дека ЕУ покрена постапка за кршење на договорот против британската влада, поради нејзиниот спорен предлог-закон со кој се откажува од дел од договорот за Брегзит.
„Утрово, Комисијата одлучи да испрати писмо до британската влада, во кое се повикува да ги почитува своите обврски. Ова е прва фаза од процедурата на кршење на договорот“, објави Фон дер Лаен.
VIDEO: EU chief Ursula von der Leyen declares that Brussels is taking legal action over the British government’s attempt to overturn parts of the Brexit withdrawal agreement pic.twitter.com/zZ485vUpRP
— AFP news agency (@AFP) October 1, 2020
Во писмото до Велика Британија се наведува дека британската влада има рок од еден месец да одговори.
Европската комисија потенцира дека Велика Британија претходно беше повикана да го повлече проблематичниот дел од Законот за внатрешен пазар до крајот на септември.
Се додава дека Законот, по својата природа, ги крши обврските преземени со добра волја, што произлегуваат од договорениот Договор за одвојување.
„Рокот истече вчера, проблематичните одредби не беа повлечени, а Комисијата го започна првиот чекор од прекршочната постапка со испраќање на официјално известување до властите на Велика Британија“, вели претседателката на Комисијата, Урсула фон дер Лаен.
Во Брисел наведуваат дека и покрај овој чекор, тие ќе продолжат да работат на целосно и навремено спроведување на Договорот за повлекување на Обединетото Кралство од ЕУ.
„Ние се придржуваме кон преземените обврски“, заклучи Фон дер Лаен.
