На 33 лица кои биле вработени, преку АПВ, во ЈП „Комунална хигиена“-Скопје кои месеци и години земале плата а не оделе на работа, денес им завршија договорите и истите не се продолжени, информираат од оваа институција.
Во ЈП „Комунална хигиена“-Скопје мора да се стави крај на расипничкото трошење на парите на граѓаните и посветено да се работи на подобрување на услугите и исполнување на нашите обврски кон граѓаните, се појаснува во писмениот допис.
„Истовремено кон вработената во ЈП „Комунална хигиена“-Скопје која денес предизвика инцидент веќе е отпочната дисциплинска постапка. Работниот процес мора да се одвива професионално и со почит кон секој. Претпријатието е отворено и транспарентно за сите граѓани и медиуми и во иднина нема да се дозволи недолично или несоодветно однесување во Претпријатието, а сѐ во насока на имплементација на реформи за подобри работни процеси во интерес на граѓаните“, е наведено во соопштението од ЈП„ Комунална хигиена“ по реакцијата на ЗНМ за малтретирани новинари од страна на службеници во Комунална хигиена при што беше побарано од МВР итно да реагира.